Paano Kumita ng Pera Kahit Wala Kang Sariling Pera

Paano Maging Successful. Story# 1.

Itong kuwentong ito na ibabahagi ko sa iyo ay personal kong karanasan. Taong 2004, noo'y nagtuturo ako bilang part-time instructor sa isang maliit na Information Technology (IT) school sa Muntinlupa City, nagkaroon ako ng pagkakataong mabasa ang librong isinulat ni Robert Kiyosaki na may title na Rich Dad, Poor Dad sa tuwing bakante ako o kaya ay nasa bahay habang nag-aaral para sa next subject na ituturo ko. Sa loob ng tatlong araw ay natapos ko itong basahin. Dito pumasok sa isip ko kung paano magkaroon ng investment at extra money. Bilang isang part-time na instructor sa isang maliit na school, kumikita lamang ako ng P4,300.00 kada buwan noong mga panahong iyon. Ganun lang kaliit ang kinikita ko dati. Wala man lang akong savings o ipon. Eh sa liit ba naman ng sahod ko ultimo budget sa pagkain araw-araw ay kinakapos pa ako. Wala akong credit card. At lalong wala akong parents na magsusugal ng pera para pautangin ako sa isang negosyong walang katiyakan kung magiging successful o hindi.

Luck (o Suwerte).

Isang araw may tumawag akin. Ang girlfriend kong si Lany. Isa siyang sekretarya sa isang opisina noon. Excited siya na sabihin sa akin na inaaalok daw siya ng isang credit card company na umutang ng pera na may interes lamang na 0.99% kada buwan. At ito ay maaaring bayaran sa loob ng dalawa at kalahating taon o 30 months. Naisip ko napaka-swerte ko naman. Akalain mo na ganun kalaki ang tiwala ng girlfriend ko sa akin na kaya kong palaguin ang uutangin niyang pera sa isang bangko. Napagtanto ko na ito na marahil ang hinihintay kong suwerte. Sa isang kisap-mata (at walang kakurap-kurap_, sinabi ko sa kanya na umutang na siya ng P50,000.00 gamit ang kanyang credit card at ako na ang bahalang magbabayad buwan-buwan sa kanya.

Opportunity (o Pagkakataon).

Makalipas ang isang linggo, na-approved ang inutang na pera ng girlfriend ko mula sa isang credit card company. Kinausap ko ang nanay ko tungkol sa plano kong pagpapautang gamit ang perang inutang ko rin lang. At dahil nasanay na ang nanay ko sa pagpapautang ng puhunan sa mga maliliit na tindahan, binigyan niya ako ng pagkakataon na magpautang ng puhunan sa ilang maliliit na negosyante sa probinsiya na madalas ay nangungutang naman sa ilang private lenders mula 7% hanggang 10% interest monthly. At upang makahikayat ako ng mga negosyanteng mangutang sa akin, nag-alok ako ng mas mababang interest na 5% lamang kada buwan.  Malaki ang 5% interest kada buwan, pero mas maliit ito kumpara sa ilang nagpapautang ng 7% to 20% sa probinsiya. Hindi ko sukat akalain na sa loob lamang ng isang araw ay inutang na lahat ang perang puhunan ko at marami pang lumalapit sa akin para mangutang pa ng kanilang gagamiting puhunan o capital sa negosyo. At ito ang naging simula ng success story ko sa lending o pagpapautang kahit wala akong sariling pera o savings.


Paano ako kumita sa lending?

Simple lang naman ang paraan kung paano ka kikita at lalago sa pagpapautang gamit ang perang inutang mo lang din sa iba. Ganito ang ginawa ko:

Ang perang pinautang sa akin ay P50,000.00. Ang interest nito ay 0.99% or P495.00 monthly, tama? Sa loob ng 30 months ang magiging tubo ng bangko sa akin ay P14,850.00 (P495.00 x 30 months). Ang computation ng credit card para sa buwanang babayaran ko ay (P50,000.00 + 14,850.00) / 30 months. Kaya ang magiging buwanang babayaran ko ay P2,161.67 lamang sa loob ng 30 buwan. Pagkatapos ng 30 buwan ay bayad na ang lahat ng utang ko sa bangko.

Ngayon naman, kung ipapautang ko ang perang inutang ko na may interest na 5%, ako ay tutubo ng P2,500.00 kada buwan, tama?. At ang tinubo koong P2,500.00 mula sa pagpapautang ay may sobra pang P338.33 matapos kong mabayaran ang credit card ng P2,161.67 kada buwan. Sa loob ng 30 months, ang sobra sa tinubo ko na P338.33 kada-buwan ay may kabuuang P10,150.00 (P338.33 x 30 months).

P10,150.00 lang ba ang kinita ko sa loob ng 30 buwan? Hindi! Dahil pagkatapos ng 30 months ay maliban sa P10,150.00 na naging savings ko ay nabayaran ko na din ang lahat ng utang ko sa credit card. At heto dito buong-buo pa din ang original na P50,000.00 na pinautang ko at ito ay akin na. Tama ka sa nabasa mo. Akin na ang buong P50,000.00! At ito ay patuloy pa ding kumikita ng interest kada buwan!

Sa loob ng 30 months, nagkaroon ako ng P10,150.00 + P50,000.00 = P60,150.00 mula sa zero (0) savings o walang sariling pera o puhunan. At ang pera ko na P60,150.00 ay patuloy na kumikita ng 5% o  P3,007.50 kada buwan at ito ay buong-buo kong natatanggap dahil wala na akong utang sa bangko. Ang kinikita ko dito ay tinatawag na passive income na may unlimited return on investment (ROI).

Anong sumunod kong naging hakbang? Umutang ulit ako sa bangko para maging puhunan ulit sa aking lending business. Ang P60,150.00 na kabuuang kinita ko ay inilagay ko naman sa ibang investment katulad ng farming (ito ay iku-kuwento ko naman sa ibang blog ko).

Madali lang ang paraan, di ba? Kahit wala kang sariling pera ay pwede kang magkaroon ng isang simpleng negosyo o kaya ay karagdagang kita (passive income). Sigurado ako na kayang kaya mong gawin ito kahit ikaw ay isang ordinaryong empleyado o simpleng manggagawa na may maliit na sahod sa kasalukuyan. Ano sa palagay mo? Kailan mo sisimulang pag-aralan ang ganitong paraan ng pagnenegosyo?