Ang kuwentong ibabahagi ko ngayon ay tungkol naman ito sa kung papaano magkaroon ng isang milyon o higit pa sa pamamagitan ng pagma-may-ari ng lupa o real estate. Ito ay halaw sa tunay na pangyayari sa buhay ng mga magulang ko.
Mahigit na 25 taon ang nakalipas, may isang nakatiwangwang na bakanteng lote ang na foreclosed ng isang bangko sa aming probinsiya noon. Ito ay may sukat na 1,000 metro kuwadrado (1,000 square meters). Ang halaga ng bawat metro kuwadrado noon ay nasa P40 pesos lamang kaya ang kabuuang halaga nito noong mga panahong iyon ay nasa P42,000 lamang. At dahil masipag, maparaan at maraming 'raket' ang nanay ko mula sa kanyang pagbebenta ng mga beauty products katulad ng Avon, nakapag-ipon siya ng mahigit sa P42,000 na lingid sa kaalaman ng tatay ko na isang ordinaryong empleyado. Sumali sa tinatawag na bidding ang nanay ko at naibigay sa kaniya ang ari-ariang ito sa halagang P42,001. Totoo yun, P42,001 ang halaga dahil itinaas ng nanay ko sa halagang piso ang orihinal na halaga ng ibini-bid na lupa kaya ito ay nakuha niya sa halagang P42,001!
Makalipas ang 25 taon, naging maunlad ang karatig ng bakanteng loteng ito at marami na ang mga kabahayan sa paligid ng lupang dating nakatiwangwang lamang. Sa katunayan, ang halaga ng bawat metro kuwadrado ng lupain na nasa paligid ng bakanteng loteng ito ay nasa P1,500 hanggang P1,800 na!
Kaya kung ibebenta ng nanay ko ngayon ang lupang kanyang nabili sa halagang P42,001 noon, ito ay nagkakahalaga na ng P1,800,000 pesos!
Ang pag-iingat ng mga lupain ang isa sa mga sikreto ng mga mayayamang angkan na may malawak na lupain noong unang panahon na sa kasalukuyan ay nagkakahalaga na ng ilang daang milyon hanggang ilang bilyong piso na.
Kaya, kaibigan, kung may pagkakataon kang makabili ng sariling lupain o lote, sunggaban mo na agad ito sa lalong madaling panahon. Dahil tiyak na darating ang araw, ang lupang inaalagaan mo ngayon ay maaaring makapagdulot ng kayamanan sa iyo at sa iyong pamilya balang-araw.
No comments:
Post a Comment