Paano Magkaroon Ng Inaasam Na Bagay (Kahit Ito Ay Mamahalin) Kahit Wala Kang Perang Pambili

Paano Maging Successful. Story# 3.

Nakakatatlong kuwento na ako dito sa ating paboritong blog kung paano maging tunay na successful. Ang pangatlong kuwento ko naman ay mula sa personal kong karanasan noong taong 2010.

Taong 2010. Hindi ko malilimutan ang taong ito. Ito ang taon kung kailan kami naging ganap na mag-asawa ng aking girlfriend na si Lany. Halos siyam na taon din kaming naging magkasintahan bago namin pinaghandaan at pinagplanuhan ang pagpapakasal.

Pagkatapos ng kasalan, niyaya ako ng aking mga in-laws na nagta-trabaho sa Singapore na pumunta doon sa kanila para “mag-baka-sakali” ng kapalaran bilang OFW. Pero dahil wala sa hinagap ko ang magtrabaho sa ibang bansa noong mga panahong iyon, inirekomenda ko ang aking kapatid na mag-baka-sakali doon.   

Matalino, mahusay, masipag, at matiyaga ang kapatid ko. Mga katangian ng isang taong makakatagal sa ibang bansa para magtrabaho. Subali’t walang ganoong lakas ng loob ang kapatid ko para mag-apply doon. Hinikayat ko siya na ako ang bahalang gagawa ng kanyang resume at ako ang bibili ng ticket sa eroplano niya papunta ng Singapore. At sinabi ko pa na kapag hindi siya natanggap sa trabaho sa Singapore sa loob ng isang buwan, umuwi na lang siya ng Pilipinas at huwag na niyang bayaran ang ticket sa eroplano na binili ko. Pero kapag siya ay natanggap sa isang kumpanya gamit ang resume na ginawa ko bago matapos ang isang buwan at kapag siya ay inalok ng P100,000.00 o higit pa na kita kada buwan sa magiging trabaho niya, ako ay bibilhan niya ng paborito at inaasam-asam kong laptop sa IT expo sa Singapore.

Ano sa palagay mo ang sumunod na nangyari?

Tama ka. Natanggap siya sa trabaho sa loob lamang ng tatlong linggo at inalok ng mahigit P100,000.00 na buwanang kita. Hindi lamang ang kapatid ko ang nalubos ang kagalakan. Higit akong nag-celebrate dahil matutupad na ang pangarap kong laptop dahil sa aking ‘mahiwagang’ resume.

Hindi ko naman inaalis ang katotohanan na kaya siya naging successful sa kanyang pagpunta sa ibang bansa ay dahil sa kanyang angking talino at abilidad. Subali’t hindi ko din inaalis na malaking bagay ang nagawa ko sa kanya para makapagbigay ng motivation para matupad ang pangarap niya na makapagtrabaho sa ibang bansa at kumita ng malaki at makapag-invest sa negosyo balang araw.

Sa kasalukuyan, maliban sa lalo pang tumaas ang offer sa kanya, ay nakapag-invest na rin siya sa real estate. Nakabili na siya ng 5 apartments na up-and-down at na nakuha niya ito ng “bargain” sa halagang P2,000,000.00. Nakapag-invest na din siya sa farming at lending businesses ng mahigit P1,000,000.00. Siya na din ang nagpapa-aral sa iba naming pamangkin. At nabibili na niya ang halos lahat ng paborito ng aming mga magulang at kapatid. Naisasama na rin niya sila sa pag-tour sa iba’t ibang bansa. Ang mga bagay na ito ay nangyari lamang sa loob ng tatlong taon.

Naisip mo ba na maaaring ang pagtulong mo sa iba (kahit na hindi sa material na bagay) lalo na kung ma-motivate mo sila ay may-doble o triple o higit pang biyaya ang darating sa iyo? Marunong ang Diyos na lumikha sa atin. At kung kabutihan ang iyong itinanim, kabutihan din ang iyong aanihin.

O, ano pa ang hinihintay mo? Puntahan mo na ang kapamilya mo o kamag-anak mo o kaibigan mo o kahit sinong tao na maaaring mangailangan ng tulong mo. Malay mo ikaw naman ang pagkalooban ng biyaya dahil sa tulong na ipinagkaloob mo sa iba. Ano sa palagay mo?