Paano Kumita Ng Isang Milyong Piso o Higit Pa Sa Loob Ng Isang Taon Sa Pamamagitan ng Freelancing

Ito ba ang unang pagkakataon na marinig mo ang ganitong pangungusap; "ang kumita ng isang milyong piso o higit pa sa pamamagitan lamang ng freelancing"?

Hindi ako magiging tapat sa iyo kung sasabihin ko ngayon na madali lamang ang paraan para ka kumita ng isang milyong piso, o kahit na nga isang daang libong piso sa isang taon sa trabaho bilang isang freelancer. Hindi sapat ang pumasok ka sa butas ng karayom para kumita ng salapi sa trabaho man o negosyo. Isang sakripisyo ang kailangan mong pagdaanan bago ka kumita ng malaki sa pag-freelancing. Dapat kaya mong i-isantabi ang iyong pride kapag tinanong ka ng mga kakilala, kapitbahay at mga kaibigan mo (lalo na ng mga kamag-anak mo) ng ganito, "Bakit hindi ka yata nagta-trabaho?" o kaya naman ay ganito, "Bakit hindi ka maghanap ng maayos na trabaho at sinasayang mo ang pinag-aralan mo?" o ang mas matindi, "Nasisiraan ka na ba, anong ipapakain mo sa pamilya mo kung barya-barya lang kinikita mo dyan sa pagpi-freelance mo?"

Ang tanong ko sa'yo kaibigan, kaya mo bang i-isantabi ang pride mo at harapin ang ganitong mga pagsubok at paghamon sa kakayahan mo? Kaya mo bang dibdibin ang mga masasakit na maririnig mo mula sa mga taong akala mo ay bilib sa kakayahan mo? Kaya mo bang tiisin ang pagkalam ng iyong sikmura at kung minsan maging ang sikmura ng iyong pamilya dahil kakaramput lamang ang kinikita mo bilang nag-uumpisa pa lamang sa freelancing na trabaho at kailangan ninyong pagkasyahin ang panimulang kinikita mo? At sa kabila ng lahat ng ito, kaya mo pa din bang maging positibo ang pananaw sa buhay at bibilib ka pa din ba sa kakayahan mo at maniniwala ka pa din na isang araw ay magiging matagumpay ka pa din bilang isang freelancer?

Ito ang mga pagsubok na maraming taong nangarap maging full-time na freelancer ang umayaw na lamang (at ang ilan pa nga di man lang nagsimula ay tumalikod na). At ito din ang dahilan kung bakit iilan lamang ang nagiging matagumpay na freelancers sa atin: mga freelancers na kumikita ng isang milyon o higit pa sa isang taon at may malaking oras para sa pamilya at may malawak na pagkakataon na mapaunlad ang sarili sa pamamagitan ng pagtayo sa sariling paa (at di nakaasa sa 'pasahod' ng ibang tao o kumpanya).

Ngayon, kung handa ka nang maging freelancer at willing ka na i-give-up ang lahat kasama ang iyong pride, ibabahagi ko naman ang mga hakbang kung paano maging matagumpay na freelancer sa susunod kong blog.